تاند ( چهارشنبه، د سنبلې ۱۹) د افغانستان د عامې روغتیا وزارت مسولان وایي، چې د سړې هوا په موسم کې د کورونا وبا د دویمې څپې خپرېدو ګواښ شته دی.
د یاد وزارت ویاند اکمل سمسور ویلي ښايي، چې د ژمي موسم کې په نړۍ او افغانستان کې د کورونا وبا دویمه څپه هم خوره شي.
هغه نن په کابل کې یوې خبري ناستې ته د خبرو پر مهال، پر لوړ عمر لرونکو، پر شکر او د وینې پر لوړ فشار اخته ناروغانو باندې غږ وکړ، چې باید د انفلونزا خزاني واکسین تر لاسه کړي.
نوموړي زیاته کړه که څه هم د کورونا وبا له خپرېدو را وروسته په پنځه دېرشمه اوونۍ کې پر دغې وبا د اخته کېدونکو کسانو شمېر ۱۰ سلنه کم شوی دی، خو په خبره یې هېوادوال باید د دغه ویروس مخنیوي لپاره روغتیایي سپارښتنې په جدي توګه عملي کړي.
دا په داسې حال کې ده ، چې د روغتیا وزارت وایي، چې په تېرو ۲۴ ساعتونو کې د هېواد په بیلابیلو ولایتونو کې د کورونا وبا ۲۴ نورې مثبتې پېښې ثبت شوې دي.
سرچینې ویلي، چې له دې سره پر یادې ناروغۍ د اخته کسانو شمېر ۳۸ زره او ۵۴۴ ته رسېدلی دی.