تاند(چهارشنبه، د سنبلې ۱۹) د بښنې نړیوال سازمان وایي، د افغان سولې مذاکراتو کې باید د دې اوږدې جګړې د اصلي قربانیانو غږ واورېدل شي.
د یادې ادارې د دفتر عمومي رییس ډیویډ ګریفس ویلي، د سولې خبرو کې باید د افغانانو غږ واورېدل شي څو هغوی دا ډاډ تر لاسه کړي چې حقونو ته یې درناوی کېږي.
نوموړي زیاته کړې، د جګړې دواړه اړخونه باید د عامو افغانانو لپاره عدالت تامین او د بشري حقونو سرغړونکي حساب ورکولو ته راکاږي.
نوموړي ویلي، سوله یوازې د یوې معاملې او د دښمنیو د بندولو معنا نه لري بلکې د سولې اصلي معنا دا ده چې ټول وګړي په امن فضا کې ژوند وکړي او په ډېرې اسانۍ د خپلو حقونو د خوندي تابه لپاره غږ پورته کړي.
یاد سازمان له افغان حکومت څخه هم غوښتنه کړې چې د تېرو لاسته راوړنو خوندیتوب برخه کې دې ځان مطمین کړي څو د بشري حقونو لپاره ترسره شوې هڅې په اوبو لاهو نه شي.