پنجشنبه, مارچ 28, 2024
Homeخبرونهولسمشر غني او عبدالله عبدالله قطر ته تر سفر مخکې د مذاکراتي...

ولسمشر غني او عبدالله عبدالله قطر ته تر سفر مخکې د مذاکراتي ټیم سره ولیدل

تاند، چهارشنبه د سنبلې ۱۲: ولسمشر اشرف غني او عبدالله عبدالله قطر ته تر سفر مخکې د حکومت د مذاکراتي ټیم له رئیس او غړو سره ولیدل.

له ارګ څخه په خپره شوې اعلامیه کې راغلي، په دې لیدنه کې ولسمشر غني، د ملي روغې جوړې عالي شورا رئیس عبدالله عبدالله او د سولې مرکچي پلاوي مشر او غړو ګډون درلود.

دغه ناسته چې نن له غرمې مخکې په چهار چنار ماڼۍ کې جوړه شوې وه، ولسمشر غني د مذاکره کوونکي ټیم غړو ته ډاډ ورکړ چې د ملي ټیم په توګه د افغانستان د دولت او خلکو کلک ملاتړ له ځانه سره لري.

ولسمشر غني زیاته کړې د سولې خبرې یوه حساس پړاو ته رسېدلي او دا خبرې کوونکي ټیم به له طالبانو سره د یوه منسجم ټیم په توګه د افغان حکومت او خلکو په استازیتوب خبرې اترې کوي.

ښاغلي غني مذاکره کوونکي ټیم ته په خبرو کې ویلي، جمهوریت او تنوع د دوی د ځواک نقطې دي او خلک کولی شي تنوع، وحدت او همغږي په دغه ټیم کې وویني.

په همدې حال کې ولسمشر غني ټینګار کړی چې اساسي قانون د ملي وثیقې په توګه ټولو ته حدود مشخص کړي دي.

ولسمشر زیاته کړې د سولې مذاکره کوونکي پلاوي په ترکیب کې علما، ښځې او ځوانان هر یو خپل سیاسي وزن لري او د ټولنې د هرې برخې استازولي کولی شي.

محمد اشرف غني د طالب بندیانو د خلاصونو موضوع ته په اشارې سره ویلي، دولت د سولې پروسه کې هغه ژمنې چې نړیوالې ټولنې یې هیله لرله عملي کړي دي.

په ورته مهال د ملي روغې جوړې عالي شورا رئیس عبدالله عبدالله د سولې مذاکره کوونکي پلاوي ته په خطاب کې ویلي: «تاسو د افغانستان د دولت او خلکو ټینګ ملاتړ څخه برخمن یاست او د مذاکراتو په جریان کې به د ملي واکمنۍ، ملي ارزښتونو او ملي ګټو د ساتنې، د جمهوریت، د ښځو د حقونو، بیان ازادۍ او د امنیتي او دفاعي ځواکونو د ټینګ ملاتړ لپاره د قربانیانو د کورنیو په ګډون د افغانستان د ټولو خلکو استازیتوب کوئ.»

ښاغلي عبدالله زیاته کړې د افغانستان دولت د سولې پروسه کې خپل ټینګ عزم ښودلی او په خبره یې طالبان هم باید په دې برخه کې خپله ژمنتیا وښیي.

نوموړي د حکومت مذاکره کوونکي ټیم ته ویلي چې هغوی سخته دنده لري او په خبره یې باعزته او تلپاتې سولې ته د رسېدو لپاره ټول سره متحد دي.

تر دې وړاندې ځینو حکومتي چارواکو ویلي وو چې د نن ورځې تر پایه به د حکومت له زندانونو پاتې طالب بندیان خوشې شي او په مقابل کې به یې طالبان هم کمانډو سرتېري خوشې کوي.

LEAVE A REPLY

Please enter your comment!
Please enter your name here

- Advertisment -

ادب