تاند، سه شنبه د سنبلې ۴: د کرنې وزارت وايي د کندهار د انارو په حاصلاتو کې زیاتوالی راغلی او کیفیت یې د پخوا په پرتله ښه شوی دی.
د کرنې، اوبو لګولو او مالدارۍ وزارت په یوه خبرپاڼه کې ویلي چې کندهار کې په نهه زره او ۵۰۰ هکتاره ځمکه کې د انارو باغونه جوړ شوي او زیاته کړې یې ده چې سږ کال به یې حاصلات ۱۹۰ زره ټنو ته ورسېږي.
د کرنې وزارت د معلوماتو له مخې تېر کال ددې ولایت د انارو حاصلات ۱۷۸ زره او ۱۲۵ ټنو ته رسېدل، خو سږکال به دا اندازه ۱۹۰ زره ټنو ته پورته شي، چې د تېر کال په پرتله لس سلنه زیاتوالی ښیي.
که څه هم د کندهار ولایت بڼوال د انارو له حاصلاتو خوښ دي خو په دې برخه کې د مناسب بازار له نشتون سر ټکوي. او وايي که حکومت ورسره په دې برخه کې همکاري وکړي د انارو په تولیداتو کې به نور زیاتوالی هم راشي.
د ځايي مسؤلینو په خبره د کندهار ارغستان او ارغنداب ولسوالۍ د کندهار تر ټولو ډېر انار تولیدوي.
په ورته وخت کې د کندهار د کرنې ریاست مسؤلین وايي، چې د بڼوالو روزنه، د ګیاوو د ناروغیو کنټرول او د درملو تجویز هغه څه دي چې سږ کال یې د انارو په حاصلاتو کې زیاتوالی رغلی دی.
د مسؤلینو د معلوماتو له مخې د کرنې وزارت په همکارۍ په دغه ولایت کې د سور انار په نوم د جوسو یوې فابریکې په فعالیت پیل کړی، چې د انارو د جوسو تر څنګ د انارو پروسس هم کوي.
د کندهار انار د کورنیو بازارونو ترڅنګ یو شمېر ګاونډیو هېوادنو او په دې وروستیو کې د هوایي دهلیزونو له لارې نړیوالو مارکېټونو ته هم لاره پیداکړې چې په نړیوالو بازارونو کې ځانګړی نوم لري.
هر کله چې د هیواد د داخلی تولیداتو او یا په هغه کې د زیاتوالی په هکله واورم او یا ووینم نو دومره د خوښۍ احساس کوم چې ویلی یی نه شم.
خو ولی ستونزه داده چې چې دولتی ارګانونه خپل مسولیت نه درکوی باید دوی ته د ناروغیو ضد درمل،اب خورۍ،بسته بندۍ او بازار موندنه کې نه ستړی کیدونکی هځی وکړی،چې نه د بڼوالو زړونه مات شی نه د حکومت له داخلی تولیداتو سره مخ نه شی.
که امکان لری نو په کلنې ډول دی خوندې شی او مشروباتو مختلف کار خونې په کار پیل ته وهڅول شی چې د هیواد لا پرمختګ سبب وګرځی.