تاند ( سه شنبه، د سنبلې ۴) د هلمند د کرنې ریاست مسولان وایي، چې په دې ولایت کې د دوی څېړنو ثابته کړې، چې ګڼ بوټي له اقلیم سره توافق لري او کرکېله یې د دې ولایت لپاره ګټوره ده.
د هلمند د کرنې او مالدارۍ د ریاست د مسولانو په خبره خرما، اینجه، د ستروس میوه او نور هغه بوټي دي، چې په دې ولایت کې یې کرنې ښه پایله لرلې ده.
دوی وایي تمه ده، چې سلګونه کروندګرو ته په راتلونکو کلونو کې د دغه بوټو د سمې کرنې، پالنې د روزنې ترڅنګ پر زرګونه جریبه ځمکه ازمایښتي باغونه جوړ شي.
دوی وایي یاد بوټي په هلمند کې د کوکنارو د کرکېلې ښه بدیل دی او هیله من دي، چې په دې سره به د کوکنارو کرکېله په پوره توګه بنده شي.
کرنیز پوهان وایي په هلمند کې د نویو بوټو د کرکېلې دودېدل به د دې سبب شي، چې د نشه يي توکو له کښت او کاروبارڅخه خلک ډډه وکړي.
هلمند د هېواد یو له هغو ولایتونو څخه شمېرل کیږي، چې په کې کروندګر ډیر د کوکنارو په کرکېله بوخت دي.