تاند، شنبه د سنبلې ۱: د بدخشان ولایت ځايي چارواکي وايي د هغو ښځینه زده کوونکو چې د دغه ولایت په مایمي ولسوالۍ کې ترې د طالبانو د مخالفت له امله د کانکور ازموینه پاتې وه، سبا یکشنبه اخیستل کېږي.
د بدخشان د والي مرستیال اختر محمد خیرزاده وايي، د ازموینو د ملي کمېټې او سیمه ییزو مسؤلینو ترمنځ د هوکړې له مخې به له دغو شاوخوا ۱۸۰ تنه نجونو څخه ددغه ولایت په شغنان ولسوالۍ کې د کانکور ازموینه واخیستل شي.
ښاغلي خیرزاده زیاته کړه ددغو زده کوونکو د ترانسپورت لګښت د بدخشان والي محمد ذکریا سودا په غاړه اخیستی دی.
په همدې حال کې د بدخشان د امنیه قومندانۍ ویاند ثناالله روحاني وايي، ددې سیمې حکومتي چارواکو ددغو ښځینه زده کوونکو د انتقال لپاره د خاص نقلیه وسایطو انتظام کړی دی.
د روحاني په خبره ټاکل شوې وه له دغو زده کوونکو تېره ورځ په شکي ولسوالۍ کې د کانکور ازموینه اخیستل شوې وی، خو په خبره یې د طالبانو د مخالفت له وجې ترې پاتې شوه.
له بلې خوا دغو زده کوونکو په همغږي سره له ولسمشر غني غوښتي چې د دوی لپاره د کانکور امتحان زمینه برابره کړي.
د ولسمشر ویاند صدیق صدیقي دغې غوښتنې ته په ځواب کې ویلي، حکومت د نجونو د تعلیم برخه کې د اسانتیاوو برابرولو ته ژمن دی. او په خبره یې په دې برخه کې به مسؤل بنسټونه لازم اقدامات تر سره کړي.