تاند (پنجشنبه، د اسد ۳۰) د امریکا ولسمشر ډونالډ ټرمپ نن وویل، که ثابته شي چې په افغانستان کې پر امریکايي پوځیانو د حملو لپاره نورو هیوادونو انعامونه ټاکلي دي، امریکا به غچ ورڅخه واخلي.
د رویټرز خبري اژانس د راپور له مخې، ښاغلي ترمپ په دې اړه څه ونه ویل چې ایا د خپل هیواد د استخباراتي ادارو د راپور په اړه یې دریځ بدل شوی او که نه دی.
مخکې ټرمپ د استخباراتي ادارو دا راپور تایید کړی نه و چې ویلي یې و روسیې پر امریکايي پوځیانو د حملو په وړاندې طالبانو ته انعامونه ټاکلي دي.
د امریکا د بهرنیو چارو وزیر مایک پامپیو هم دا راپورونه تایید کړي او ویلي یې دي چې ورته کار ایران هم کړی دی.
خو ټرمپ، چې په امریکا کې له روسیې سره د ځانګړو اړیکو په لرلو تورن دی، د روسیې له لوري د طالبانو د ملاتړ راپورونه نه تاییدوي او ویلي دي چې پر هغو باور نه کوي.
روسیې دا رپورونه رد کړي دي.
سي این این روانه میاشت د امریکا د استخباراتي ادارو په قول راپور ورکړ چې ایران هم په افغانستان کې پر امریکايي پوځیانو د حملو په خاطر طالبانو ته د پیسو او وسلو انعامونه منلي دي.
ایران هم دا رپورونه رد کړي دي.
ټرمپ نن (پنجشنبه) په سپینه ماڼۍ کې د عراق له صدراعظم سره په غونډه کې خبریالانو ته وویل«که ثابته شي چې دا راپورونه حقیقت لري، موږ به سخت ګوزار ورکړو.»
د کانګریس دیموکرات غړي او نور منتقدان پر ټرمپ تور پورې کوي چې د نوومبر په میاشت کې د بیا انتخابېدو په غم کې دی او د امریکايي پوځیانو مرګ ژوبلو ته اهمیت نه ورکوي.
د نوومبر په درېمه نېټه د امریکا د ولسمشر انتخابات دي او د دیموکرات ګوند کاندید جو بایډن د ټرمپ په وړاندې کاندید دی.