تاند (پنجشنبه، د اسد ۳۰) د بریتانیا آی ټي وي تلویزیوني چاینل وايي تېره شپه سلګونه افغانان د مانچستر ښار تر ټولو په مهم او له ګڼې ګوڼې ډک واټ کې راټول شول چې له بریتانیا څخه د افغانستان د بشپړې خپلواکۍ د بېرته اخیستو یوسلو لومړۍ کالیزه ولمانځي.
د راپور له مخې، په ویدیويي تصویرونو کې افغانان لیدل کېږي چې د خپل هیواد ملي بیرغ یې په لاسونو کې دی او اورلوبه کوي.
پولیس چارواکي وايي، دوی مجبوره شول چې د ویلیم سلو واټ یوه لویه برخه د ترافیکو پرمخ وتړي.
خو سیمه ییز ښاروال احمدعلي د غونډې برخوال په دې وغندل چې د مقرراتو خلاف راټول شوي او د خپل هیواد د خپلواکۍ جشن لمانځي.
ده وویل«موږ له دې نظره اعتراض نه لرو چې دوی ولې د خپلواکۍ کالیزه لمانځي بلکې زموږ انتقاد په دې دی چې د قرنطین په اوسنیو شرایطو کې باید خلک راټول نه شي ځکه چې کورونا خپرېږي.»
د علي احمد په وینا د کورونا وبا د مخنیوي لپاره پر غونډو او د ګڼې ګوڼې پر جوړولو بندیز دی.
ده وویل چې په مانچستر کې بېلابېل ملتونه اوسي چې مختلف کلتورنه، ژبې او عقاید لري چې ورته درناوی لري.
د مانچستر ښاروال دا هم وویل«موږ په ۲۰۱۸ یا ۲۰۱۹ کال کې نه یوو، دا ۲۰۲۰ کال دی او موږ د کورونا وبا په خاطر په بیړني حالت کې ژوند کوو.»
د آی ټي وي د راپور له مخې، افغانان هر کال په مانچستر کې د خپلواکۍ ورځ لمانځي ځکه چې دوی په ۱۹۱۹ م کال له بریتانیا څخه د خپلو هیواد بشپړه خپلواکي په همدې ورځ بېرته اخیستې وه.