تاند، پنجشنبه، د اسد ۳۰مه: د غور ولایت سیمه ییز چارواکي وايي، په دغه ولایت کې د سړک غاړې ماین چاودنې ۷ کسانو ته مرګژوبله اړولې ده.
د غور د والي ویاند عارف عابر پېښه تاییدوي او وايي، نن تر غرمې وروسته د سړک غاړې ماین په یوه سراچه ډوله موټر چاودنه کړې چې له امله یې پینځه ملکي وګړي وژل شوي او دوه نور ټپیان شوي دي.
د نوموړي په خبره دا پېښه له ښاره ۲۵ کیلو متره لرې د بادګاه په کلي کې رامنځته شوې ده.
ښاغلی عابر زیاتوي، د سړک غاړې ماین د طالبانو له لوري د بادګاه په کلي کې چې د غور –کابل په لویه لاره موقعیت لري اېښودل شوی وو.
د غور د والي ویاند وايي، اوس هم د همدې لارې په اوږدو کې د امنیتي ځواکونو او طالبانو تر منځ نښته روانه ده، خو په خبره یې امنیتي ځواکونو ته کوم زیان نه دی اوښتی.
هغه زیاته کړه د غور –کابل پر لویه لاره طالبانو بمونه ځای پر ځای کړي چې هېڅ تګ راتګ پرې نه کېږي.
دا په داسې حال کې ده چې څو ورځې وړاندې د غور مرغاب ولسوالۍ د طالبانو لاس ته لوېدلې وه، خو د یوې ورځې په تېرېدو سره بېرته امنیتي ځواکونو ونیوله.