تاند( پنج شنبه، د اسد ۳۰) د غور ولایت د والي ویاند عارف عابر وایي، چې د دې ولایت په دولت یار ولسوالۍ کې د ماین چاودنې له امله ۵ ملکي وګړي وژل شوي او ۲ نورټپیان دي.
دعابر په خبره پېښه هغه مهال رامنځته شوه چې د ملکي وګړو یو سراچه موټر د دولت یار ولسوالۍ او فیروزکوه ښارترمنځ بادګاه سیمه کې پرسړک غاړې ماین وربرابر شو.
نوموړی وایي په وژل شویو او ټپيانو کې میرمنې او ماشومان هم شامل دي او د ټپيانو وضعت د ډاډ وړ بولي.
د دې پېښې پړه تراوسه چا پرغاړه نه ده اخیستې.
دغه راز د یوه بل خبر له مخې د کندز ولایت د دشت ارچې ولسوالۍ اوسېدونکي وایي، چې په دغه ولسوالۍ کې پر یو کور د هاوان مرمۍ لګېدو له امله د یوې کورنۍ درې ماشومان وژل شوي او درې نور ټپیان دي.
دوی وایي د هاوان دا مرمۍ تېره شپه د یادې ولسوالۍ ارباب سیمه کې د ملکيانو پرکور لګېدلی دی او ادعا کوي، چې امنیتي ځواکونو توغولې ده.
د دغه ولایت چارواکو تر اوسه په دې اړه څه نه دي ویلي.
د یادونې ده، چې له دې دوه ورځې وړاندې په غزني ولایت کې هم په ورته یوه پېښه کې د یوې کورنۍ څوغړو ته مرګ ژوبله اوښتې وه.