تاند، سه شنبه، د اسد ۲۸مه: د طالبانو له لوري د خپلواکۍ د بېرته ګټلو ۱۰۱ کلیزې په مناسبت په خپره کړې اعلامیه کې راغلي، د افغانستان خلکو له بریتانیا څخه ازادي واخیسته او د ۱۹ او ۲۰ پېړۍ استعماري قوت يې دې ته اړ کړ چې د دې هيواد او ملت ازادي په رسمیت ومني.
اعلامیه زیاتوي دوی د یوویشتمې پېړۍ ښکېلاکګر دې ته اړ کړل چې د افغانانو استقلال ته احترام ولري او طالبان په همدې سره بریا ته نږدې شوي دي.
دا په داسې حال کې ده چې د افغانستان حکومت او ګڼ شمېر افغانان طالبان د پاکستان د ګټو جنګیالي بولي.
طالبانو د سیمې په هېوادنو غږ کړی چې د افغانستان ثبات د ټولې سیمې له پرمختګ سره مرسته کوي او غوښتنه یې ترې کړې چې له دوی سره د سولې په راوستو او ثبات کې همکاري وکړي.
طالبانو له خپل لوري په داسې مهال دغه څرګندونې کړي چې ګڼ شمېر افغانان او نړیوال اوس هم دغه ډله د تاوتریخوالي او جګړې عامله بولي.
که څه هم حکومت په څو څو ځلې طالبان په دې برخه کې پړ ګڼلي خو دوی له خپله لوري د تاوتریخوالي دوام رد کړی او ویلي یې دي، چې حکومت په لوی لاس د سولې پروسې پر وړاندې خنډونه جوړوي.