تاند (شنبه، د اسد ۲۵) د افغانستان د ملي روغې جوړې د عالي شورا مشر ډاکتر عبدالله عبدالله د افغان حکومت له مرکچي پلاوي سره لیدلي دي.
د ملي روغې جوړې د عالي شورا له دفتر نه په خپره شوې خبرپاڼه کې د عبدالله له قوله لیکل شوي، چې د سولې مذاکراتي پلاوی به د افغانانو له قوي او پراخ ملاتړ سره د خبرو مېز ته کېني.
دسرچینې په حواله نوموړي دغه راز ویلي، چې د مرکچي پلاوي لومړۍ او اساسي اجنډا په افغانستان کې سراسري اوربند دی.
عبدالله زیاته کړې، چې مرکچي پلاوی به د افغانستان له تېرو ۱۸ کلونو لاسته راوړنو به په کلکه دفاع کوي.
په ورته مهال د افغانستان مذاکراتي پلاوي بین الافغاني خبرو ته پوره چمتوالی ښودلی او د مذاکراتو له جریانه یې د خبري پوښښ د ورکولو ډاډ هم ورکړی دی.
د ملي روغې جوړې د عالي شورا مشر داسې مهال د حکومت له مذاکراتي ټیم سره ګوري، چې تېره ورځ د دې پلاوي پر یوې غړې فوزیه کوفي وسله وال برید شوی او نوموړې په کې ټپي شوې ده.
د یادونې ده، چې بل لورته وسله والو طالبانو تازه په یوه اعلامیه کې یوځل بیا ویلي، چې افغان حکومت په رسمیت نه پيژني او د سولې خبرې به له سیاسي جهتونو سره ترسره کړي.