تاند، شنبه، د اسد ۲۵ مه: په ولسي جرګه کې د بدخشان د خلکو پخوانۍ استازې او د سولې په بین الافغاني خبرو کې د حکومت د مذاکره کوونکي ټیم پر غړې فوزیه کوفي د کابل –پروان پر لاره د کابل په شکردرې ولسوالۍ کې وسله وال برید شوی دی.
د حکومت د مرکچي ډلې مشر محمد معصوم ستانکزي په یوه ټوېټري پیغام کې ویلي، مېرمن کوفي بېګا ماښام د کابل په قره باغ ولسوالۍ کې د نامعلومو وسله والو په برید کې ټپي شوه.
ښاغلي ستانکزي ویلي اوسمهال د مېرمن کوفي روغتیايي وضعیت ښه دی.
د حکومت د مذاکره کوونکي ټیم رئیس زیاته کړه، امنیتي ادارې د پېښې په هکله څېړنې کوي چې جزیات به یې وروسته له خلکو سره شریک کړي.
تر اوسه د دغه برید مسؤلیت کوم چا یا ډلې په غاړه نه دی اخیستی.
باید وویل شي چې په دې وروستیو کې د کابل –پروان په لاره ناامنۍ زیاتې شوي، چې وخت ناوخت ورته پېښې رامنځته کېږي.
د مرکچي ټیم دغه غړې په داسې حال کې د یوه وسله وال برید هدف ګرځي چې ښايي د حکومت او طالبانو تر منځ په نږدې راتلونکي کې د سولې خپلمنځي خبرې پیل شي.