تاند(جمعه، د تسد ۲۴) په فاریاب ولایت کې د طالبانو یوه ۱۰ کسیز ګروپ د سولې له بین الافغاني خبرو څخه مخکې خپلې وسلې په ځمکه کیښودي.
په فاریاب ولایت کې د طالبانو یوه ۱۰ کسیز ګروپ د سولې د بین الافغاني خبرو له نږدې کیدو سره خپلې وسلې کېښودلې او د سولې پروسې سره یوځای شول.
دغه جنګیالي د تېرو پنځو کالونو په ترڅ کې، په ځانګړې توګه د فاریاب – جوزجان د لویې لارې په اوږدو کې په جنګي فعالیتونو کې ښکېل ول.
هغوی خپلې وسلې تیره ورځ د هغو مراسمو په ترڅ کې چې په میمنه کې د هغوی د تسلیمۍ په مناسبت جوړ شوي وو، چارواکو ته وسپارلې.
د تسلیم شوي ګروپ یوه غړي ملا عظمت الله احدي وویل، «زه خوښ یم چې له پنځو کالونو څخه وروسته له خپلې کورنۍ سره یوځای کیږم او بیا به خپل ماشومان په غېږ کې نیسم.»
د فاریاب والي نقیب الله فایق د تسلیمۍ په مراسمو کې خبریالانو ته وویل، د بین الافغاني خبرو د پیل په درشل کې د طالبانو د ګروپ تسلیمېدل د جنګ او تاوتریخوالي پای ته رسېدل په ګوته کوي.
تمه ده چې د افغانانو تر منځ د سولې خبرې په څو ورځو کې پیل شي.