تاند، سه شنبه، د ثور ۲۳مه: د پښتون ژغورنې غورځنګ یو مهم مشر او د پاکستان د پارلمان غړی علي وزیر په کورونا وېروس اخته شوی دی.
د غورځنګ یو بل مشر محسن داوړ پر خپله ټوېټر پاڼه لیکلي چې د علي وزیر وضعیت ښه دی او له خلکو یې غوښتي چې دعا ورته وکړي.
د پي ټي ایم د سرچینو په قول، علي وزیر دوه ورځې وړاندې د کورونا وېروس ټېسټ ورکړی و او نن سه شنبه یې پایله مثبته وختله.
ښاغلي داوړ ویلي، چې علي وزیر د اوس لپاره ځان د پارلمان د غړو د استوګنې ځای کې قرنطین کړی دی.
محسن داوړ وایي، ده هم خپله معاینه کړې ده خو پایله یې منفي راختلې.
دا په داسې حال کې ده چې د پاکستان د قامي اسمبلۍ رئیس اسد قیصر هم څه موده وړاندې په کورونا وېروس اخته شوی و او ځان یې قرنطین کړی دی.