تاند(چهارشنبه، د اسد ۲۲) د بلخ د امنیه قوماندانۍ ویاند عادل شاه عادل وایي چې د بلخ په مارمل ولسوالۍ کې یو هلک له انجلۍ سره د ټلیفوني اړیکې په تور سخت ډبول شوی.
عادل د چهارشنبې په ورځ د رسنیو ته وویل چې دغه ځوان له یوې انجلۍ سره د ټلیفوني اړیکو د درلودلو له امله صحراي محاکمه شوی دی.
د عادل پر وینا پولیسو د پېښې په تړاو یې شپږ تنه نیولي دي.
ویل کېږي چې دغه ځوان ژوندی دی خو روغتیايي وضعیت یې ښه نه دی.
د بلخ د والي ویاند منیر احمد فرهاد وویل چې په مارمل ولسوالۍ کې د حاجي عبدالرحمان په نوم د یوه کلي ملک، له یوې پېغلې سره د دغه ځوان د ټلیفوني اړیکې په اړه له خبرېدو وروسته نوموړی صحرايي محاکمه کړی دی.
خو د بلخ د والي ویاند زیاته کړه چې پولیسو ۷ تنه د پېښې په تړاو نیولي او دوه تنه نور تښتېدلي دي.
فرهاد وویل چې د نیول شویو اوو کسانو دوسیې عدلي او قضايي بنسټونو ته سپارل شوي دي.