تاند ( چهارشنبه، د اسد ۲۲) ناټو او ترکیې تلپاتې سولې ته د رسېدو لپاره د افغان سولې ملاتړ کړي دی.
په کابل کې د ناټو ملکي استازي سټیفانو پونتیکورو ډاډ ورکړی، چې دوی به تلپاتې سولې ته رسېدو پورې له افغانستان او د دې هېواد ملي امنیتي ځواکونو سره ولاړ وي.
پونتیکورو ویلي، چې دوی به په دې برخه کې به خپلو هر اړخیزو همکاریو ته دوام ورکړي.
افغانستان کې د ناټو پر ټویټر پاڼه راغلي، چې پونتیکورو دا څرګندونې نن د ولسمشر غني له لومړي مرستیال امرالله صالح سره په لیدنه کې کړې دي.
سرچینه کاږي چې په دې لیدنه کې د سولې برخه کې پر پرمختګونو او بین الافغاني مذاکراتو ته پر چمتوالي هم خبرې شوې دي.
دغه راز په کابل کې د ترکیې سفیرهم د ملي روغې جوړې د عالي شورا له مشر ډاکتر عبدالله عبدالله سره په لیدنه کې ویلي، چې هېواد یې د افغان سولې پروسې بشپړ ملاتړ ته ژمن دی.
د ملي روغې جوړې د عالي شورا دفتر په یوه خبرپاڼه کې ویلي، چې اوزان ارطغرل نن د دغې شورا له رییس عبدالله عبدالله سره په لیدنه کې هیله ښودلې، چې بین الافغاني خبرې ژر پیل او افغانستان تلپاتې سولې ته ورسېږي.
د یادونې ده، چې د افغان حکومت له لوري د ۴۰۰ طالب زندانیانو د خوشې کېدو د فرمان تر لاسلیکېدو وروسته ګڼو هېوادونو او سازمانونو د حکومت له پرېکړې هرکلی کړی او د بین الافغاني مذاکراتو پر ژر پیلېدو یې ټینګار کړی دی.