تاند ( چهارشنبه، د اسد ۲۲) په پکتیا ولایت کې د یوه کور دېوال نړیدلی، چې له امله یې د یوې کورنۍ ۷ ماشومان مړه شوي دي.
د یاد ولایت د والي ویاند عبدالرحمن منګل وایي، چې دا پېښه تېره ورځ د دغه ولایت په سیدکرم ولسوالۍ کارېز سیمه کې شوې ده.
منګل زیاته کړه په دې پېښه کې د یوې کورنۍ ۷ ماشومان مړه شوي، چې په کې ۵ نجونې او ۲ هلکان شامل دي.
نوموړی وایي د ټولو وژل شوی کسانو عمرونه له نهه کلنۍ کم دي.
د منګل په خبره یاده سیمه کې تیره ورځ ډیر زیات ورښت له امله سیلابونه راووتل او خلکو ته یې مالي او ځاني زیانونه واړول.
په پکتیا کې د وروستیو ورښتونو له امله ګڼو نورو کورنیو ته هم مالي زیانونه اوښتي دي.
زیانمنې کورنۍ وایي، تراوسه ورسره د حکومت له لوري هېڅ مرسته نه ده شوې او نه یې هم پوښتنه شوې ده.