تاند(شنبه، د اسد ۱۸) د لویې جرګې په تالار کې د فراه د خلکو استازې د بلقيس روشن د وهلو په غبرګون کې د افغانستان د آزادو رسنیو ملاتړ ادارې یا نی ویلي، چې د بیان آزادي باید خوندي شي او په ملي غونډو کې باید له پامه ونه غورځول شي.
تېره ورځ د مشورتي لویې جرګې په لومړۍ ورځ میرمن بلقیس روشن غوښتل په لاریون کې خپل غږ پورته کړي او دا شعار ورکړي چې “وحشي طالبانو ته د باج ورکول یو ملي خیانت دی” خو له غبرګون سره مخ شوه او په زوره له تالار نه وویستل شوه.
نی ویلي،چې دا پیښه د نافذه قوانینو څخه سرغړونه ده او په افغان حکومت او ولسمشر محمد اشرف غني یې غږ کړی، چې د قضیې په هکله څېړنه وکړي.
په خبرپاڼه کې راغلي: “دا مسله باید په اسانۍ له پامه ونه غورځول شي ، ځکه چې د سولې په مشورتي جرګه کې ګډونوال د خپلو نظرونو د څرګندولو لپاره سره راټول شوي ، که نه نو د غونډې منطق به رد شي.”
په ټولنیزو رسنیو کې یوه ویډیو هم ښیې چې د لویې جرګې عامه تالار کې یوه ښځه د بلې ښځې لخوا وهل ټکول شوې.
په ورته وخت کې ، د سولې مشورتي لویې جرګې رییس عبدالله عبدالله د افغانستان ملي تلویزیون سره په مرکه کې وویل چې د میرمن بلقیس روشن سره ترسره شوی چلند غلط او د منلو وړ نه و.
عبدالله په داسې حال کې چې له میرمن روشن څخه بښنه وغوښته ، دا هم وویل چې دا مسله باید وڅیړل شي.