تاند (پنجشنبه، د اسد ۱۶) د کندهار په سپین بولدک ولسوالۍ کې په سلګونو کسانو د پاکستاني حکوت خلاف او د افغان امنیتي ځواکونو په ملاتړ لاریون وکړ.
لاریون والو د پاکستاني حکومت ضد شعارونه ورکول او ویې ویل د پاکستان د وروستیو کړنو پر وړاندې راوتلي دي.
د لاریون یوه ګډونوال تاند سره په خبرو کې وویل، دغه کسان په سپین بولدک ولسوالۍ کې راټول شوي او د پاکستاني پوځیانو د لوی اختر د شپې برید او ټولې هغه کړنې چې د بې ګناه افغانانو په حق کې یې کوي غندي او ور څخه غواړي چې نور دې دغو ظلمونو ته د پای ټکی کېږدي.
نوموړی وايي د پاکستان چې څه خوښه وي د افغانانو په حق کې یې کوي او په خبره یې نه د لر او نه د بر پښتنو خیال ساتي.
هغه زیاتوي وايي پاکستان تل هڅه کړې چې د افغانستان خلاف اقدامات تر سره کړي خو په خبره یې نوره اجازه نه ورکوي چې دا ډول بریدونه وکړي.
دوی له پاکستان څخه غواړي څو د ستونزو جوړېدو او جګړې څخه لاس واخلي.
لاریونوال پاکستان ته خبرداری ورکوي که عسکرو یې بیا ځل داسې کړنې ترسره کړې سخت ځواب به ورکړي.
د تېرې پنجشنبې په ماښام پاکستاني ملېشو هېواد پر ګڼ شمېر افغانانو چې غوښتل یې خپل هېواد ته راستانه شي بریدونه وکړل، چې په پایله کې یې ۹ تنه ووژل شول او تر ۵۰ نور ټپیان شول.