تاند ( چهارشنبه، د اسد ۱۵) د هند د بهرنیو چارو وزارت وایي، چې په افغانستان کې یې دوه تښتول شوي وګړي تر دوو کالو ځنډ وروسته خوشې شوي دي.
یاد وزارت په یوه اعلامیه کې ویلي، چې د ۲۰۱۸ز کال په مې کې یې اووه تنه انجنیران په بغلان کې د وسله والو طالبانو تښتولي وو.
سرچینه زیاتوي، چې طالبانو له یاد شمیر کسانو ۴ له دې وړاندې خوشې کړي وو او دوه یې اوس خوشې کړل.
هندي چارواکي وایي دغه انجنیرانو بغلان ولایت کې د برېښنا د لېږد په یوه پروژه کې کارکاوه، چې وسله والو طالبانو وتښتول.
په اعلامیه کې هند په دې برخه کې د افغان حکومت له هڅو هم مننه کړې او زیاته کړې یې ده، چې دوی به له افغانستان سره خپلو همکاریو ته ادامه ورکوي.
هندي حکومت د دغه خوشي شوو کسانو د هویت په اړه لا ډېر معلومات نه دي ورکړي.
بل لورته وسله والو طالبانو هم تر اوسه په دې تړاو څه نه دي ویلي.