تاند – په تېره لیکنه کې مو د ماشوم د روزنې او پالنې مهم اصول څرګند کړل، په دې برخه کې د والدینو پر روزنیزو سبکونو رڼا اچوو.

۱- بې پروا یا ډېر نرم سبک

په دې سبک کې مینه زیاته او کنټرول کم وي.

ځانګړنې

قوانین کم یا نه وي.
ماشوم پرېښودل کېږي چې هر څه چې یې زړه غواړي ویې کړي.
والدین ډېر نرم او بخښونکي وي.
د ماشوم تېروتنې جدي نه ګڼي.
د والدینو رول تر ډېره د ملګري په څېر وي.

پر ماشوم اغېزې

د ځان باور او عزت نفس کمېدل.
د چلند ستونزې.
د احساساتو په کنټرول کې ستونزې.
د زده‌کړو کمزوری پرمختګ.

۲- مقتدر یا متوازن سبک

دا د روزنې تر ټولو اغېزمن او سپارښتل شوی سبک ګڼل کېږي. پکې مینه او کنټرول دواړه په متوازن ډول موجود وي.

ځانګړنې

څرګند قوانین او اصول لري.
د قوانینو دلیل ماشوم ته تشریح کېږي.
د ماشوم احساساتو ته ارزښت ورکول کېږي.
له تشویق او مثبتې روزنې څخه کار اخیستل کېږي.
د والدینو او ماشوم ترمنځ سالمه اړیکه موجوده وي.

پر ماشوم اغېزې

مسوول او خپلواک شخصیت.
پر ځان لوړ باور.
ښه ټولنیز مهارتونه.
د ستونزو د حل او تصمیم نیولو وړتیا.

۳- مستبد یا سخت‌دریځی سبک

په دې سبک کې کنټرول ډېر او مینه کمه وي.

ځانګړنې

سخت قوانین.
د اطاعت غوښتنه پرته له پوښتنې.
د سزا کارول.
د ماشوم احساساتو ته لږه پاملرنه.
د نظر څرګندولو محدود فرصت.

پر ماشوم اغېزې

د ځان کم ارزښته ګڼل.
بدخويي او غوسه.
دروغ ویل او پټول (د کوم کار یا کومې خبرې).
د منطقي ستونزو په حل کې کمزوري.

۴- رټل یا بې‌پامه سبک

په دې سبک کې نه مینه وي او نه هم مناسب کنټرول.

ځانګړنې

د ماشوم پر ژوند کم نظارت.
د والدینو او ماشوم ترمنځ کمې اړیکې.
د ماشوم اړتیاوو ته کمه پاملرنه.
د روزنې روښانه اصول نه لري.

پر ماشوم اغېزې

د ځان‌باورۍ کمزورتیا.
خپګان او یوازیتوب.
د زده‌کړو ستونزې.
د ټولنیزو اړیکو کمزوري.

د روزنیزو سبکونو اغېزې

څېړنې ښيي چې مقتدر یا متوازن سبک د ماشوم د رواني، عاطفي او ټولنیز پرمختګ لپاره تر ټولو ګټور دی. په دې سبک کې ماشوم هم د مینې احساس کوي او هم د اصولو او مسوولیتونو اهمیت زده کوي.

د مناسب روزنیز سبک د انتخاب لپاره مهمې سپارښتنې

د ماشوم خبرو ته په غور غوږ ونیسئ.
د هغه احساسات درک او ومنئ.
د ماشوم اساسي اړتیاوې پوره کړئ.
له ماشوم سره ډېرې سترګې په سترګو خبرې، موسکا، غېږ او مینه وکړئ.
ماشوم د کورنیو خبرو اترو برخه وګرځوئ.
د هغه نظرونه واورئ او درناوی یې وکړئ.
له سختو سزاوو او ترټلو څخه ډډه وکړئ.
له ستاینې او تشویق څخه ډېر کار واخلئ.
د کور قوانین روښانه کړئ او دلیلونه یې بیان کړئ.
د اصولو د ماتولو پایلې عملي کړئ.
د ماشوم لپاره د لوبو او ګډو فعالیتونو وخت ځانګړی کړئ.
د هغه د تفریح او فراغت وخت په سالمو فعالیتونو ډک کړئ.

پایله

هر ماشوم ځانګړی شخصیت لري او هره کورنۍ خپل ځانګړي شرایط لري. له همدې امله د روزنې کوم ثابت او بشپړ فورمول نشته. خو ډېری متخصصان د مقتدر یا متوازن روزنیز سبک سپارښتنه کوي، ځکه چې دا د مینې، درناوي، مسوولیت او نظم ترمنځ مناسب توازن رامنځته کوي. که د ماشوم په روزنه کې له ستونزو سره مخ یاست، د ماشوم د روزنې له یوه مسلکي مشاور سره مشوره کول ګټه لرلی شي.

د ماشوم روزنه او پالنه؛ مهم اصول – پل