تاند- د هند د سختدریځو هندوانو ګوند یوه مشر د هغې فلمي ستوري د وژلو پر سر نژدې یو نیم ملیون ډالره انعام کېښود چې فلم یې لا بازار ته راوتلی نه دی.
د (Padmavati) په نوم فلم، چې د یوې هندوې ملکې او یوه مسلمان واکمن ترمنځ د اړیکو په اړه دی، په هند کې یو شمېر خلک سخت پارولي دي.
د هریانا د شمالي ایالت د بهارتیا جنتا ګوند مشر سورج پال امو د یکشنبې په ورځ د فلمي ستوري دیپیکا پادوکون (Deepika Padukone) او د فلم جوړوونکي سنجې لیولا بهانسال پر سر جایزه اعلان کړه.
د دغه فلم جوړوونکي یا پرودیوسر د فلم خپرول، چې ټاکل شوې وه د دسمبر په لومړۍ یې په سینماګانو کې خپور کړي، ځنډولي دي.
امو په یوه غونډه کې وویل چې اجازه به ورنه کړي چې دا فلم خپور شي.
د پادماواتي (Padmavat) کیسه په همدې نوم د ۱۶ پېړۍ له یوه تصوفي حماسي شعر څخه اخیستل شوې ده چې د راجپوت یوه زړه وره او ښکلې ملکه د دې لپاره چې د ډیلي پښتون پاچا علاالدین غلجی (خلجی) یې ژوندۍ ونه نیسي، غوره ګڼي چې ځان ووژني.
د پېړیو په اوږدو کې دا حماسه، سره له دې چې تاریخي اسناد یې نشته، په تاریخ بدله شوې ده.
