تاند ( سه شنبه، د اسد ۱۴) د بامیان ولایت سیمه ییزچارواکي وایي چې د دې ولایت ښکلاوو د ډیرو سیلانیانو پام ځان ته اړولی دی.
بامیان د هیواد یو له امنو او تاریخي ولایتونو څخه ګڼل کیږي، چې هر کال په زرګونو کورني او بهرني سیلانیان یې لیدنې ته ورځي.
د یاد ولایت سیمه ییز چارواکي وایي، چې یواځې د تیر لوی اختر په ورځوکې ۲۵ زره سیلانیانو له بامیان ولایت څخه لیدنه کړې ده.
دوی زیاتوي، چې د یادو سیلانیانو لپاره روغتیايي تدابیر هم په پام کې نیول شوي وو.
د یادونې ده، چې تر اختر وړاندې د بامیان ولایت روغتیايي مسوولینو د اختر ورځو کې د ماسک او یو شمیر نورو روغتیايي توکو د وړیا ویش خبر هم ورکړی وو.
بامیان ته ورغلي سیلانیان وایی، چې دلته په راتګ او د دې ولایت ښایستونو لیدل یې یو ارمان وو او ترې برخمن شول.
له دې وړاندې چارواکو ویلي وو چې په لاره کې د شته ستونزو له امله بامیان ولایت ته د سیلانیانو تګ راتګ کم شوی دی.
له بامیان وروسته ختیځ نورستان هم یو له هغو ښکلو ولایتونو شمېرل کیږي، چې ډیری کورني او بهرني سیلانیان یې لیدو ته ورځي.