تاند (دوشنبه، د اسد ۱۳) د افغانستان د ملي دفاع وزارت وايي امنیتي او دفاعي ځواکونو اوربند ته دوام ورکوي.
د ملي دفاع وزارت مرستیال ویاند فواد امان وايي د اوربند دوام د خلکو غوښتنه ده، چې امنیتي ځواکونه د ولس غوښتنو ته لبیک وايي او په خبره یې د اختر په ورځو کې د شوي بریدونو څېړنه کوي.
افغانان نه یواځې له حکومت بلکې له طالبانو هم غواړي چې د اوربند موده وغځوي.
ددې لپاره چې خلک په خوښۍ لوی اختر ونمانځي د افغانستان حکومت او طالبانو درې ورځنی اوربند اعلان کړی وو.
په ورته مهال د ملي امنیت شورا وايي ټول هغه اقدامات یې تر سره کړي تر څو طالبان د درې ورځني اوربند موده وغځوي.
طالبانو تر اوسه د اوربند د غځولو په باره کې څه نه دي ویلي.