تاند(یکشنبه، د اسد ۱۲) افغان ولسمشر محمد اشرف غني وايي، چې د هیواد په ۳۴ ولایتونو کې د ښځو د مرستیالانو په توګه د ګمارلو پروسه به په دریو میاشتو کې پلې شي.
محمد اشرف غني پرون شنبه په سمنګان ولایت کې یوې عامه غونډې ته وویل چې،” د دې خلکو ګمارنه کې به د منځګړیتوب له لارې مخنیوی وشي. ”
هیڅ څوک د حکومتي چارواکو، وکیلانو یا مشهورو شخصیتونو سره د اړیکې له مخې نه ټاکل کیږي.
د افغانستان حکومت تیره سرطان میاشت کې اعلان وکړ چې د هر ولایت لپاره به ښځینه معاونه وټاکل شي.
د دې عمل هدف په قدرت کې د ښځو برخه اخیستل او د اداري اصلاحاتو پلي کول بلل کیږي.
ولسمشر غني په داسې حال کې دغه خبرې کوي چې په ځینو ګمارنو یې مدني ټولنو او ځوانانو غبرګون وښود چې ګمارني د وړتیا پر اساس شوې نه دي بلکې له لوړپوړو حکومتي چارواکو سره د اړیکو په لرلو سره ټاکل شوي.