تاند (شنبه، د اسد ۱۱) په ننګرهار کې د ورښتونو او سېلابونو له امله ۱۶ تنه وژل شوي او څلور نور ټپيان شوي دي.
د ننګرهار د والي ویاند عطالله خوګیاڼي وايي د دغه ولایت د کوز کونړ ولسوالۍ د قلعټک اړوند زوړ کلي کې د نن سهار سختو ورښتونو او سېلابونو راوتلو له امله د ۱۵ ماشومانو په ګډون ۱۶ تنو خپل ژوند له لاسه ورکړی او ۴ نور ټپیان شوي دي.
نوموړی وايي په پېښه کې یو ماشوم هم نادرکه شوی چې د پیداکولو لپاره یې هڅې روانې دي.
د خوګیاڼي په خبره په سیمه کې زیات شمېر کورونه وران شوي او فصلونه یې اوبو له منځه وړي دي.
د ولایتي ادارې په لارښوونه سیمې ته یوه کمېټه لېږل شوې څو له زیانمن شویو کورنیو سره بېړنۍ او لومړنۍ مرستې تر سره کړي.
د ځايي خلکو په خبره ددغو سېلابونو له امله د جلال آباد-کونړ لویه لاره د ترافیکو پر مخ تړل شوې ده.
دغه پېښه نن سهار وختي شااوخوا ۴ بجې د تېز توپان، ورښت او سېلاب له امله رامنځته شوې ده.