رواني فشار: هر کله چې انسان له ډار یا هم له کړاوونو او ستونزو سره لاس او ګریوان شي نو دغو څیزونو ته یو ډول ځاني او ذهني غبرګون ښکاره کوي چې رواني فشار یا رواني بوج ورته وایو.

په نورمال حالت کې انسان پر دغو ستونزو برلاسی وي او ځان کې د دې وړتیا ویني چې دا ټول څیزونه مدیریت او تر کنترول لاندی وساتي. دا رواني فشار د انسان د ژوندي پاتی کېدلو لپاره تر یوې کچې پورې نورمال، اړین او لازمي عمل دی چې په ترڅ کې یې انسان لا تکړه کېږي او پر خپل ځان یې باور ډېرېږي، چې بیا په ورځني ژوند کې لا ښه پرمختګ وکړي او د کور، کار او ټولنیز ژوند د غوښتنو او چیلنجونو سره ځان ښه او سم عیار کړي.

خو کله بیا دا کړاوونه، ستونزې، چیلنجونه او غوښتنې دومره ډېرې یا سختې شي چې انسان په ځان کې د دې وړتیا او توان نه ویني چې دا حالت کنترول، مدیریت او ورسره مقابله وکړي نو ورته رواني فشار یا بوج د ناروغۍ په بڼه را منځ ته شي.

که ستونزې ډېرې یا پېچلې وي، که د چا د وړتیا او توان کچه ټیټه وي او یا دا رواني فشارونه پرله پسې او دوامداره وي نو د ډېر سخت او دروند رواني فشار لامل کېږي چې بیا دا په خپل وار د انسان مزاج، احساسات او ټولې اړیکې اغېزمنوي او هم نورو رواني ستونزو لپاره لاره هواره وي.

نور بیا…