تاند- جاپان، چې په دوهمه نړیواله جګړه کې له ماتې وروسته د پوځي وسایلو په جوړولو کې له محدودیتونو سره مخامخ دی، تېره اوونۍ لومړنۍ پوځي سپوږمکۍ فضا ته ولېږله.
جاپاني متخصصانو دا سپوږمکۍ د خپلو پوځیانو د ملاتړ او د شاوخوا سمندرونو په تېره بیا د ختیځ سمندرګي د څارلو لپاره توغولې ده.
چین او جاپان په ختیځ سمندرګي کې د (دیایویو) ټاپوګانو پر مالکیت اختلاف لري.
جاپاني سپوږمکۍ، چې سپارکل نومېږي، د جاپان یوه له درو دفاعي او پوځي سپوږمکیو ځنې ده چې د درو پخوانیو سپوږمکیو ځای نیسي.
جاپان وايي چې دا سپوږمکۍ د دغه هیواد سمندري او مځکنیو ځواکونو ته امکان ورکوي چې له رالېږل شویو معلوماتو څخه چټکه استفاده وکړي.
جاپان وروسته له دې په فضا کې د پوځي معلوماتو په برخه کې فعالیت زیات کړ چې تېر کال شمالي کوریا ۲۰ قاره ویشتونکي توغندي وویشتل او ورپسې د جاپان او چین ترمنځ د ختیخ سمندرګي او جنوبي سمندرګي پر سر لانجې رامنځته شوې.