تاند (شنبه، د اسد ۴) په بدخشان کې د کران و منجان لاجوردو کانونو د نیولو په سر له درې ورځو راهیسې د امنیتي ځواکونو او طالبانو تر منځ نښتې روانې دي.
د بدخشان د امنیه قومندانۍ ویاند ثناءالله روحاني وویل طالبانو درې ورځې وړاندې د لاجوردو کان د نیولو په موخه په کران و منجان ولسوالۍ له څو خواوو بریدونه وکړل.
روحاني زیاته کړه د طالبانو له حملې وروسته د امنیتي ځواکونو او طالبانو تر منځ تر اوسه نښتې دوام لري.
نوموړي وویل مرسته کوونکي سرتېري سیمې ته رسیدلي دي او د منجان په ساحه کې د دواړو لوریو تر منځ نښتې دوام لري.
د روحاني په خبره ددې له امله چې په کران و منجان ولسوالۍ کې مخابراتي شبکې په سم ډول کار نه کوي د نښتې د دواړو لوریو د تلفاتو په اړه معلومات نه لري.
هغه زیاته کړه طالبانو غوښتل د کران و منجان د لاجورد کان په خپله ولکه کې واخلي خو امنیتي ځواکونو یې مخه ونیوله.
باید وویل شي چې وخت ناوخت وسله والې ډلې ددغه کان د نیولو هڅې کوي خو د امنیتي ځواکونو له خوا په شا تمبول کېږي.