تاند(چهارشنبه، د اسد ۱) د افغانستان د بهرنیو چارو وزارت وايي چې د بهرنیو چارو سرپرست وزیر محمد حنیف اتمر په کابل کې د متحده ایالاتو د سفارت له شارزدافیر راس ولسن سره د ویډیوکنفرانس له لارې د سولې پر پروسې خبرې وکړې.
د بهرنیو چارو وزارت وايي، دواړو لورو د افغانستان د سولې پروسې، سیمه ییزې همکارۍ او د افغان سولې په اړه د نړیوالې اجماع د پیاوړتیا پر اهمیت خبرې وکړې.
دوی د بندیانو پر خوشې کولو، د تاوتریخوالي پر کمولو او د افغان حکومت او طالبانو ترمنځ د خبرو په سمدستي پیل بحث وکړ.
د بهرنیو چارو وزارت د بیان په پر اساس، دواړو خواوو د سیمه ییز ارتباط پر اهمیت، د سوداګرۍ په پراخولو او په ځانګړي ډول د افغانستان، پاکستان او منځنۍ آسیا د هیوادونو ترمنځ د څو اړخیزو همکاریو پر زیاتېدو هم خبرې وکړي.
د بهرنیو چارو وزارت په یوه جلا بیان کې، ویلي چې د افغانستان، امريکا متحده ایالاتو او ازبکستان کاري ډلې لومړۍ درې اړخیزه ناسته چې د ازبکستان د بهرنیو چارو وزارت د مرستیال په کوربه توب جوړه شوې وه او د افغانستان د اسلامي جمهوریت او متحده ایالاتو د بهرنیو چارو او سوداګرۍ وزارتونو مرستیالانو پکې برخه اخیستې وه، پرون ماښام ترسره شوه.
په غونډه کې د اقتصادي همکارۍ، سوداګرۍ، ترانزیت، پانګونې، ګمرکونو، د انرژۍ د لیږد او د ریل پټلۍ جوړونې، تعلیم، روغتیا، کرنې او پراختیا پر موضوعاتو باندې بحث وشو.
د افغانستان، امريکا او ازبکستان د بهرنیو چارو وزیرانو موافقه وکړه چې ګډې سیاسي، امنیتي او اقتصادي کاري ډلې رامنځته کړي.