تاند ( یکشنبه، د سرطان ۲۹) وسله والو طالبانو ویلي که افغان حکومت د بین الافغاني خبرو پیل غواړي بندیان دې ژرخوشې کړي.
د طالبانو د ویاند ذبیح الله مجاهد له لوري د اوونۍ تبصرې په نامه یو مطلب کې چې د ده په خبره د یادې ډلې دریځ څرګندوي راغلي، د بندیانو تبادله د دوحې هوکړې له مهمو برخو څخه ده او حکومت ته په کار ده، چې په دې برخه کې ور تر غاړې مسوولیت په سمه توګه ادا کړي.
هغه زیاته کړې: «حکومت لومړی له دوی سره بندي طالبان په جنایي جرمونو ککړ وبلل او بیا یې دعوه کوله چې د طالبانو په لیست کې بهرنیان موجود دي خو کله، چې یې ټولې بهانې غلطې ثابتې شوې نو اوس وایي چې نړیواله ټولنه نه غواړي دا بندیان خوشې شي.»
مطلب د طالبانو د ویاند له قوله لیکلي تر اوسه هیڅ بهرني هېواد او یا هم سازمان د طالب زندانیانو له خلاصون سره مخالفت نه دی ښودلی.
هغه ویلي د بندیانو د تبادلې برخه کې بهانې جوړول د حکومت دریځ څرګندوي چې د سولې ضد دی.
طالبانو په مطلب کې ټینګار کړی، چې که چېرته افغان حکومت په رښتیا د سولې بین الافغاني مذاکراتو پیل غواړي نو ژر دې د بندیانو د خلاصون پروسه بشپړه کړي.
د افغان حکومت اوطالبانو ترمنځ د بندیانو تبادلې ستونزه، چې ډيری یې د سولې پر وړاندې لوی خنډ بولي لا هم نه ده حل شوې.
افغان حکومت تراوسه د یاد مطلب په اړه غبرګون نه دی ښودلی خو له دې وړاندې په ځلونو ویلي، چې د طالبانو په لیست کې پاتې بندیان د درندو جرمونو له امله نه شي خوشې کولای.