تاند (یکشنبه، د سرطان ۲۹) د بشر حقونو کمیسیون د طالب زندانیانو او سولې پروسې په اړه اندېښنه ښودلې ده.
د افغانستان د بشر حقونو خپلواک کمیسون په یوه خبرپاڼه کې ویلي د طالب زندانیانو نه خلاصون د سولې پروسه له خنډ او ځنډ سره مخ کړې ده.
دغه کمیسیون په یاده مسئله اندیښنه ښودلې ده.
په خبرپاڼه کې راغلي د نړیوالو بشرپالو حقونو د عرف پر بنسټ هغه بندیان چې په بشري ضد او یا هم جنګي جنایت تورن دي باید تر سولې مخکې او حتی وروسته هم خوشې نه شي.
خبرپاڼه زیاتوي سوله د بشري حقونو د ښه والي لپاره تر ټولو مهم اصل دی چې باید د ځیني کوچنیو موضوعاتو له امله له خنډونو سره مخامخ نه شي.
د بشر حقونو خپلواک کمیسیو له افغان حکومت او طالبانو غوښتي چې دواړه لوري دې د خپلو زندانیانو په اړه کره معلومات له خلکو سره شریک کړي، تر څو د سولې روانه پروسه له خنډ او ځنډ سره مخ نه شي.
په خبرپاڼه کې د جګړې په دواړو لوریو ټینګار شوی چې له زندانیانو سره عادلانه چلند وکړي.
په خپره شوې خبرپاڼه کې له افغان دولت غوښتل شوي چې د ۵۹۲ طالب زندانیانو د نه خوشې کېدو په اړه خلکو ته اړین وضاحت ورکړي.
همدارنګه کمیسون له وسله والو طالبانو غوښتي چې د دوی په بند کې د جګړې د ټولو بندیانو د وضعیت په اړه خلکو ته معلومات ورکړي.
کميسيون د هغو زندانیانو په اړه هم اندېښنه ښودلې چې له وخته مخکې آزاد شوي دي.
دوی وايي دا زندانيان بايد د يوې خپلواکې درېيمګړې مرجع له خوا وڅارل شي، تر څو د هغوی د مجرمانه فعالیتونو، په ځانګړي ډول د هغو فعاليتونو مخنيوی وکړي چې د ملکي خلکو ته پکې مرګژوبله اوړي.
بلخوا طالبانو ویلي که حکومت د بین الافغاني خبرو پیل غواړي بندیان دې خوشې کړي.
د طالبانو ویاند ذبیح الله مجاهد د اونۍ تبصرې په نامه یو مطلب په خپله ټوېټر پاڼه خپور کړی او ویلي یې دي چې د بندیانو تبادله د دوحې هوکړې له مهمو برخو څخه ده او حکومت ته په کار ده چې په دې برخه کې ور تر غاړې مسؤلیت په سمه توګه ادا کړي.