تاند(یکشنبه، د سرطان ۲۹)ختيځ کې د ژورنالیستانو د خونديتوب کمېټې مشر شېرشاه همدرد نن د يو خبري کنفرانس پر مهال وويل، چې په دې ولايت کې خبريالانو پر وړاندې د تاوتريخوالي کچه صفر ته راښکته شوې ده.
همدرد د ۲۰۲۰ کال د لومړنيو مياشتو په بهير کې د خبريالانو پر وضعيت، د کرونا ناورين پر مهال معلوماتو ته د لاسرسي، د سولې خبرو اترو او بيان ازادۍ، د ټولنيزو رسنيو د قانون تازه طرحې او يو شمېر نورو برخو کې معلومات وړاندې کړل.
د خبريالانو خونديتوب کمېټې مشر همدا راز له دولتي مسئولينو غوښتنه وکړه، چې خبريالانو سره لا ښه چلند او د معلوماتو په ورکړه کې ور سره لازمه همکاري وکړي.
د دې کنفرانس پر مهال د خبريالانو اطلاعاتو ته د لاسرسي برخه کې يو شمېر ستونزې هم شريکې کړي.
ننګرهار کې د خبریالانو د خوندیتوب کمیټه داسې مهال د خبریالانو پر وړاندې د تاوتریخوالي د کمیدو خبر ورکوي چې لا هم د دې ولایت خبریالان له ننګونو سره مخ دي.
خبریالان وایي دوی اوس هم په دې ولایت کې اطلاعاتو ته د لاسرسي برخه کې له ستونزو سره مخ دي.
دوی اطلاعاتو ته د نه لاسرسي ترڅنګ زیاته کړه ډیر کله هغه مهال چې د فساد پر موضوعاتو کار کوي ګواښل کیږي.