خبریاله: عاقله اسد (یکشنبه، د سرطان ۲۲) په کابل کې د متحده ایالاتو سفیر راس ویلسن د افغانستان په حکومت غږ وکړ چې د اداري فساد په اړه د رسنیو راپورونه وڅیړي.
د یکشنبې په ورځ، د سرطان ۲۲ مه راس ویلسن په یوه ټویټ کې د ځینو رسنیو، خبریالانو او فعالانو د څیړنیزو راپورونو ستاینه وکړه، او له حکومت څخه یې وغوښتل چې محاسبه او شفافیت تامین کړي.
راس ویلسن لیکلي: «د ځینو رسنیو، ژورنالیستانو او فعالانو دا کار، چې له حکومت حساب غواړي، روڼتیا او حساب غواړي، د ستاینې وړ دی.»
ده همداراز ویلي:
«زه له چارواکو څخه غواړم چې ټول معتبر تورونه وڅېړي او د دوی موندنې دې عام ولس ته وړاندې کړي او د فساد عاملان دې محکمې ته راکش کړي.»
ځینو رسنیو له کورونا ویروس سره د مبارزې او په کابل کې د وچې ډوډۍ د ویش په اړه تحقیقاتي راپورونه خپاره کړل.
لومړی راپور د کورونا ویروس پر وړاندې په مبارزه کې د ملیونونو ډالرو د فساد په اړه و.
دوهم راپور د وچې ډوډۍ په ویش کې د سلګونو ملیونه اختلاس” تر عنوان لاندې خپور شو.
لومړی راپور په هرات، بدخشان، نورستان او میدان وردګ ولایتونو کې په کورونا ضد بودجې کې فساد څرګندوي.
ولسمشر محمداشرف غني د عمومي مفتش دفتر ته لارښوونه کړې چې په راپور دې بیاکتنه وکړي.
دوهم راپور “په کابل کې د وچې ډوډۍ ویش کې د سلګونو ملیونو اختلاس په اړه دی.
د راپور په اساس په کابل کې د وچې ډوډۍ د توزیع لپاره له ۸۰۰ ملیونه افغانیو زیاتې پیسې د ښاروالۍ چارواکو، د کابل ښار بیکرانو اتحادیې او بیکرانو لخوا د معاشونو په نامه اختلاس شوې دي.
د کابل ښاروالۍ او ځینو نورو چارواکو د دې راپور موندنې رد کړې دي.