تاند (یکشنبه، د سرطان ۲۲) سبا دوشنبه د افغانستان، آذربایجان او ترکمستان تر منځ درې اړخیزه ناسته تر سره کېږي.
ټاکل شوې سبا دوشنبه د سرطان په ۲۳ د افغانستان، ترکمنستان، او آذربایجان د بهرنیو چارو وزیران درې اړخيزه ناسته د وېډیو کنفرانس له لارې تر سره کړي.
د بهرنیو چارو وزارت ویاند ګران هېواد وايي چې د درې واړو هېوادونو وزیران به د یادو هېوادونو د ولسمشرانو د درې اړخیزو غونډو په پایلو او وړاندیزونو خبرې وکړي.
د هېواد په خبره په دغه ناسته کې به د یادو هېوادونو د ولسمشرانو په درې اړخیزه غونډو څخه د راپورته شویو وړاندیزونو او نظریاتو لپاره د عملي حل لارو پر جوړولو کار وشي.
د سرطان په ۱۲ ولسمشر محمد اشرف غني د آذربایجان له ولسمشر الهام علي اوف او د ترکمستان له ولسمشر قربان قلي بیردي محمدوف سره د ویډیو کنفرانس له لارې خبرې اترې وکړې.
په دغه ګډه ناسته کې پریکړه وشوه چې د سیمه ییز ارتباط ، د ریل پټلۍ پراختیا ، نوري فایبر ، ترانسپورت او سوداګرۍ د پراختیا په هدف به د درېوو هېوادونو ترمنځ ګډه کاري کمیټه جوړه شي، چې له هرو درېوو میاشتو وروسته به خپل راپورونه د ستونزو د حل او د احتمالي بیوروکراسۍ څخه د مخنيوي په موخه د یادو هېوادونو ولسمشرانو ته وړاندې کېږي.