خبریاله: عاقله اسد(پنجشنبه، د سرطان ۱۹) امریکا پر ایران یووار بیا د بندیز د غځولو غوښتنه په داسې حال کې وکړه چې پر دغه هیواد نړیوال بندیزونه د اکتوبر په نیمایي کې پای ته رسیږي.
د متحده ایالاتو د بهرنیو چارو وزیر مایک پامپیو د یادو بندیزونو د غځولو غوښتنه وکړه.
هغه د چهارشنبې په ورځ په واشنګټن کې خبریالانو ته وویل
“د ملګرو ملتونو امنیت شورا باید په سیمه کې د لا نورو شخړو د مخنیوي لپاره د ایران د وسلو بندیز وغځوي. هیڅوک په جدي ډول باور نه لري چې هغه وسلې چې ایران یې ترلاسه کوي، د کومو اهدافو لپاره کارول کېږي.”
ښاغلي پمپیو زیاته کړه چې متحده ایالاتو او د هغوی متحدینو یوه اونۍ وړاندې د یوې بېړۍ مخه نیولې وه چې په یمن کې حوثي یاغیانو ته یې ایراني وسلـې لیږدولې.
روسیه او چین ایران ته د وسلو پر خرڅلاو د بندیز اوږدولو ملاتړ نه کوي.
د ایران او ۶ نورو لویو قدرتونو ترمنځ په ۲۰۱۵ کال کې د اټومي تړون پر مهال په تهران د وسلو بندیز لګول شوی و.
امریکا په ۲۰۱۸م کال کې له دې تړونه ووته.