تاند ( چهارشنبه، د سرطان ۱۸) د افغانستان د کورنیوچارو وزارت وایي، چې له ۱۳۸۱ کال راهیسې په هېواد دننه ۱۱۷ خبریالان وژل شوي او له هیواد د باندې بیا دوه خبریالان وژل شوي دي.
یاد وزارت زیاتوي، چې دوی په دې اړه ټولو قضیو ته رسېدګي کړې ده او تر دې دمه یې ۲۸ کسان د خبریالانو د وژلو او ترور په تور نیولي دي.
د کورنیو چارو وزارت وایي د خبریالانو پر وړاندې د تاوتریخوالي ټولې قضیې یې څېړلې دي او ځینې یې اوس هم تر کار لاندې دي.
خو بل لورته د خبریالانو د خوندیتوب کمېټه بیا وایي، چې په وروستیو شپږو میاشتو کې پر خبریالانو بریدونه، د دوی پر وړاندې ګواښونه او ستونزې کمې شوې دي.
د خبریالانو د خوندیتوب کمېټه له حکومت غواړي،چې د بیان ازادۍ ملاتړ ډېر کړي او دوی ته د کار او فعالیت خوندي زمینې برابرې کړي.
افغان خبریالان ډیرکله پر حکومت له دې امله نیوکه کوي، چې د دوی خوندیتوب ته پام نه کوي.