خبریاله: عاقله اسد(چهارشنبه، د سرطان ۱۸) د کرنې، اوبو لګونې او مالدارۍ وزارت وايي، سږ کال به په هلمند ولایت کې د انګورو حاصلات د تېر کال په پرتله ډېر وي.
سږکال د هلمند د انګورو حاصلات ۹۰۷۵۰ مټريک ټنه اټکل شوي دي.
د کرنې وزارت په خبرپاڼه کې د هلمند د کرنې رییس زلمی الکو له قوله راغلي چې سږ کال به د هلمند له ۶۹۱۰ هکټاره ځمکې له تاکونو او باغونو ۹۰۷۵۰ مټریک ټنه انګور ترلاسه شي.
نوموړی زياتوي، په هلمند کې ۱۸ ډوله انګور کېږي چې د ښه کیفیت له مخې په نورو ولایتونو کې ښه مارکېټ لري.
په خبرپانه کې راغلي، د هلمند انګور د یو شمېر ولایتونو زابل، غزني، میدان وردګ، نیمروز او کابل ترڅنګ بهرنیو هېوادنو لکه پاکستان او هند ته هم صادریږي.
خبرپاڼه زیاتوي، د دې ولایت په مرکز او ولسوالیو کې عصري ممیز خونې هم جوړې شوې چې د انګورو بڼوال کولای شي انګور په ښه کیفیت په ممیزو بدل او بازار ته وړاندې کړي.
بل خوا عام خلک وایي، حکومت دې د انګورو د پلور لپاره ښه بازار پیدا کړي.