تاند (شنبه، دسرطان ۱۴) ولسمشر غني د یو حکم پر اساس د یوسف غضنفر د جنازې، تدفین او فاتحې مراسمو د ترسره کېدو په موخه کمېسیون وګوماره
د افغانستان د ولسمشرۍ ماڼۍ ویاند صدیق صدیقي په یوه ټويټري پیغام کې لیکلي، چې د ولسمشر محمد اشرف غني د حکم پر اساس د اقتصاد او سوداګرۍ پراختیا اوبېوزلۍ کمولو په چارو د ولسمشر د ځانګړي استازي محمد یوسف غضنفر د جنازې، تدفین او فاتحې مراسمو د ترسره کېدو په موخه کمېسیون وګومارل شو.
صدیقي زیاته کړې، د کمیسیون په ترکیب کې، د ملي دفاع، کورنيو چارو، ارشاد، حج او اوقافو، اطلاعاتو فرهنګ وزارتونو او همداراز د ملي امنیت شورا دفتر، د ملي امنیت عمومي ریاست، د سیمه ییزو ارګانونو خپلواکې ادارې او د ولسمشرۍ ماڼۍ د چارو ادارې عمومي ریاست استازي شامل دي.
د ولسمشر د حکم پر اساس، کمېسیون ته دنده سپارل شوې چې د هیواد په مرکز او ولایتونو کې د ښاغلي غضنفر د جنازې او فاتحې د ځانګړو دولتي مراسمو ترسره کولو په موخه هر اړخیز تدابیر ونیسي او عملي یې کړي.
ولسمشر غني په یوه خپاره کړي پیغام کې د محمد یوسف غضنفر په مړینه خواشیني څرګنده کړې او دا یې د هېواد او نظام لپاره یوه ستره ضایع بللې ده.
ولسمشر ویلي هغه یو حلیم، خیرخوا ولسي او ملي شخصت بللی او زیاته کړې یې ده نوموړي د یو متحد افغانستان لپاره کار کاوه.
د نوموړي پر مړینې د ملي روغې جوړې د عالي شورا د مشر ډاکټر عبدالله عبدالله په ګډون ګڼو نورو حکومتي مشرانو او سیاسي څېرو هم خواشیني ښودلې ده.
ښاغلی غضنفر تېره شپه د کرونا ناروغۍ له وجې ومړ.