تاند، دوشنبه، د سرطان ۲ مه: د ملي امنیت شورا وایي، وسلوالو طالبانو تېره اوونۍ د هیواد په ۳۲ ولایتونو کې ۴۲۲ تروریستي فعالیتونه کړي، چې په نتیجه کې یې ۸۴۱ افغان ملي امنیتي او دفاعي ځواکونو ته مرګ ژوبله اړولې ده.

د افغان حکومت راپور وایي، د طالبانو په بریدونو کې ۲۹۱ ملي امنیتي او دفاعي ځواکونه وژل شوي او ۵۵۰ نور ژوبل شوي دي چې د دغه تاوتریخوالي پر مهال تېره اوونۍ ۱۴۸ ولسي وګړو ته هم مرګ ژوبله اړولې ده.

په دې توګه، دا په تیرو ۱۹ کلونو کې د تاوتریخوالي له اړخه تر ټولو خونړۍ اوونۍ وه او د امنیت شورا وایي، دا اوونۍ په داسې حال کې تر ټولو خونړۍ ده، چې طالبانو ژمنه کړې وه، چې د افغانانو خلاف به تاوتریخوالی کموي او د سولې لپاره به کار کوي: ((دې ډلې له خپلو ټولو ژمنو او د افغان دولت لخوا د ښه نیت په موخه د شویو فعالیتونو سره سره لا هم د افغان مسلمان وینې توېېدنه جاري ساتلې، په خپلو ژمنو کې پاتې راغلي او د سولې لپاره یې هیڅ ښه نیت نه دی ښوولی.))

امنیت شورا ګواښ کړی چې د افغانستان اسلامي جمهوري دولت ته د خپلو خلکو خلاف روان تاوتریخوالی په هیڅ قیمت د منلو وړ نه دی: (( دا حالت باید ژر تر ژره پای ته ورسېږي او د سولې لپاره واقعي او مؤثر فعالیتونه پیل شي. د تاوتریخوالي له کمښت پرته د سولې راتګ له خنډ او ځنډ سره مخ کېږي.))

امنیت شورا وایي، تاوتریخوالی او د افغان وژنې دوام په همدې ترتیب د هیواد په کور او کلي کې د طالب خلاف دښمني نوره هم غښتلې او د ملي پخلایني او یو بل منلو پروسه خورا سخت او ستونزمن پړاو ته بیايي.