تاند، شنبه، د جوزا ۳۱مه: د ننګرهار چارواکي وایي چې سږ کال ددغه ولایت په شپږو ولسواليو کې پر ۳ زره هکتاره ځمکه هندوانې کرل شوې چې د تېر کال په پرتله يې حاصلات لس سلنه زيات شوي دي.
د دې ولایت د کرنې او اوبو لګولو رییس انعام الله صافي له تاند سره په خبرو کې وویل چې نه یوازې سږ کال په دغه ولایت کې هندواڼې بلکې د نورو تازه میوو حاصلات هم زیات شوې دي.
بل لورته د بلخ او خوست ولایت ولایت بزګرانو شکایت کړی چې حاصلات ډېر دي خو حکومت یې د بازار موندنې لپاره هیڅ هم نه دې کړي
دغه بزګران وايي، که له یوه پلوه یې حاصلات ډېر شوي خو بلخوا د دوی د کورني اقتصاد په برخه کې څه بدلون نه دی راغلی.
د بزګرانو په خبره، د ځمکې له سر نه تر مارکېټه پورې باج اخیستل د دوی ګټه کموي او که باج اخیستونکو ته پيسې ورنه کړي تازه مېوې به یې له منځه لاړې شي.
له دې وړاندې د فراه ولایت بزګرانو هم څو ورځې پرلپسې خپلې کرلې هندواڼې د فراه مرکز په سرکونو وغورځولې چې د بازار له نه شتون یې سر ټکولو خو حکومت بیا ژمنه وکړه چې حاصلات به یې نظامیانو ته د خوراک لپاره واخلي
د بزګرانو د تازه شکایتونو په اړه حکومت او د سوداګرۍ خونو تر اوسه څه ته دې ویلي.
بزګران په داسې حال کې دغه شکایتونه کوي چې د کورونا وېروس له امله ګرځبندیز او محدودیتونو هم بزګرانو ته ستونزې پیدا کړي.