 د افغانستان لپاره د پاکستان ځانګړی استازی محمدصادق خان له ټاکل کېدو ۱۰ ورځې وروسته قطر ته تللی چې له طالب استازو سره وویني.){kind=link}
تاند (جمعه، د جوزا ۳۰) د افغانستان لپاره د پاکستان ځانګړی استازی محمدصادق خان له ټاکل کېدو ۱۰ ورځې وروسته قطر ته تللی چې له طالب استازو سره وویني.
د پاکستان د بهرنیو چارو وزارت نن افشا کړه چې محمد صادق خان د روان جون په ۱۶ او ۱۷ په دوحه کې د ملا عبدالغني برادر په شمول له طالب استازو سره د افغانستان د سولې د بهیر په اړه خبرې وکړې.
ده طالب استازو ته وویل، پاکستان به په افغانستان کې د سولې او پخلاینې لپاره خپل تسهیلوونکي رول ته دوام ورکړي.
د پاکستاني رسنیو د راپور له مخې، صادق خان په دې اړه کابل ته د پاکستان د پوځ د لوی درستیز جنرال قمرجاوید باجوه وروستي «خورا ګټور او رغنده» سفر ته اشاره وکړه چې د پاکستان هلوځلو ته یې یوه نوې سا ورکړه.
د پاکستان لوی درستیز له ولسمشر غني سره د افغان سولې پر راتلونکي پړاو خبرې وکړې
په دې سفر کې، چې د جوزا په ۲۰ (جون ۹) وشو، له جنرال باجوه سره د پاکستان د استخباراتو رييس او صادق خان هم ملګري ول.
صادق خان د روان جون په شپږمه نېټه (جوزا ۱۶) د افغانستان لپاره د پاکستان ځانګړی استازی وټاکل شو.
د افغانستان لپاره د پاکستان ځانګړي استازي طالبان له امریکا سره د سولې د موافقې پر تطبیق کولو وستایل.
ده همداراز یادونه وکړه چې د امریکا او طالبانو له موافقې سره سم د بندیانو خلاصون به د بین الافغاني خبرو د ژر تر ژره پیل د بنسټ ډبره وي.
محمدصادق خان د خیبرپښتونخوا د صوابۍ اوسېدونکی دی، له پېښور پوهنتون څخه یې په سیاسي علومو ، د کولمبو له پوهنتون څخه په نړیوالو اړیکو او د اسلام اباد له ملي دفاعي پوهنتون څځه یې په امنیتي مطالعاتو کې ماسترۍ اخیستي دي.