تاند، پنجشنبه، د جوزا ۲۲مه: ولسمشر غني د اتلانتیک شورا انلاین غونډې ته اعلان کړه چې نن شپه به د درې زره طالب زندانیانو د خلاصون لړۍ بشپړه او د طالبانو د ۵ زرو بندیانو له جملې پاتې دوه زره بندیان به هم ډېر ژر خوشي شي.
ولسمشر غني د امریکا دغه څېړنیز بنسټ سره د خپلو خبرو په مهال د پوښتنو په ځواب کې وویل، د طالبانو دوه زره بندیان به ډېر ژر خوشي شي او راتلونکې اوونۍ به حکومت له طالبانو سره د مخامخ خبرو په اړه مهم اعلان وکړي.
ښاغلي غني زیاته کړه، چې د سولې په اړه یې له امریکايي او پاکستاني چارواکو سره خبرې کړې او د پاکستان له لوی درستیز سره د لیدنې په مهال له نوموړي هوکړې ته رسېدلی، چې د دواړه هیوادونو خاورې به د یو بل په ضد نه کارول کېږي او افغانستان به د دوه اړخیزو اقتصادي همکاریو په مرکز بدلېږي.
دولسمشر غني له قوله، طالبان د افغان ټولنې یو واقعیت دی او د حکومت مذاکراتي ټیم تیار دی له هغوی سره خبرو ته کېني.
نوموړي ددې تر څنګ ادعا وکړه، چې له طالبانو سره په سوله به په افغانستان کې د داعش او القاعدې خطر له منځه ولاړ نشي.
ولسمشر غني داسې مهال د پاتې دوه زره طالب زندانیانو د خلاصون خبر ورکوي چې طالبان وایي، له امریکا سره د کړي توافق له مخې ژمن دي، د خپلو پنځه زره بندیانو تر خلاصون وروسته بین الافغاني مذاکراتو ته کېني او له افغان جهتونو سره خبرې وکړي.
بل لور ته د ارګ ویاند صدیق صدیقي وایي، د افغانانو د خپلمنځي خبرو د پیل د ځای او نېټې په اړه لا پرېکړه نده شوې، خو ولسمشر غني له خلیلزاد سره ورباندې غږېدلی او په دې اړه به نور بحثونه هم کېږي.
ښاغلي صدیقي وویل، د سولې لپاره د حکومت له جدي تعهداتو او اساسي ګامونو څخه یو یې د طالب زندانیانو خلاصون و او په وینا ی چې د طالب زندانیانو د خلاصون هدف دا وو، چې د جګړې د شدت کموالی او نا اعلان شوی اوربند په ځای وساتل شي او مخامخ مذاکراتو ته لاره هواره شي.
تر دې دمه د طالبانو څه کم درې زره زندانیان خلاص شوي او د خلاصېدونکو بندیانو د څار او تائيد په موخه یې يو پلاوی لا هم په کابل کې دی.