تاند، چهار شنبه، د جوزا ۲۱مه: د د ښار جوړولو او ځمکو وزارت د ښار جوړولو معین روښان ولسمل په مشرۍ او د جلال اباد ښاروالي، د ولایت مقام استازو او د ښاري پراختیا پروژې مسوولینو په ګډون د جلال اباد ښاري پراختیا سټراټیژیک پلان چوکاټ (SDF) په تړاو مشورتي غونډه جوړه شوه.

یاد وزارت یوه خبرپاڼه کې ویلي چې د ښار جوړولو معین د یاد پلان جوړېدل او تطبیق د جلال اباد ښاري چارو مدیریت په برخه کې ارزښتناک وباله او زیاته یې کړه چې د دغه پلان په تطبیق سره به ستونزې هوارې شي.

ښاغلي روښان ولسمل ویلي، یاد پلان د جلال اباد ښار راتلونکو شلو کلونو لپاره د پراختیا نفشه ده چې تطبیق سره به یې په ښاري پراختیا، اقتصادي او کرنیزه وده او داسې نورو مهمو برخو کې مثبت بدلونونه منځ ته راشي.

خبرپاڼه کې ویل شوي؛ د ښار جوړولو او ځمکو وزارت په جوړښت کې د نړیوال بانک په مالي او تخنیکي ملاتړ د ښارونو پراختیا پروژې مسوول ډاکټر عبدالسمیع عبدالرحیمزي د جلال اباد ښاري پراختیا سټراټیژیک پلان په اړه د پرېزنټېشن په وړاندې کولو سره په پوره توګه معلومات وړاندې کړل.

د ښار جوړولو معین روښان ولسمل وایي،د جلال اباد ښاري پراختیا سټراټیژیک پلان د ګډونوالو له نظریاتو سره مل د ساساکي په نوم امریکايي کمپنۍ سره شریکیږي او تمه ده چې د روانې میلادي میاشتې تر پایه د هغه وروستی پلان ښار جوړولو او ځمکو وزارت سره شریک شي.

ویل شوي؛ یاد پلان به د کابینې تر تایید او د جمهوري ریاست عالي مقام تر حکم وروسته عملي شي.

د یادولو ده چې پرون هم دې وزارت یوه خبرپاڼه کې ویلي وو چې د جلال اباد ښار پراختیا د نوي ټاکل شوي سرپرست وزیر له لومړیتوبونو څخه دي.

دا چې دا هر څه به عمل کې څومره ثابت شي، وروسته به ولیدل شي.