تاند، یکشنبه، د جوزا ۱۱مه: د عامې روغتیا وزیر فیروزالدین فیروز رسما اعلان وکړ چې نور یې د عامې روغتیا په وزارت کې ماموریت پای ته رسیدلی دی.
ښاغلی فیروز ، چې له ۵ کلونو راهیسې د عامې روغتیا وزیر و نن یکشنبه په رسمي توګه په دې وزارت کې د خپل ماموریت پای اعلان کړ.
د عامې روغتیا وزیر وویل: “دا د خوښۍ ځای دی چې د عامې روغتیا وزارت د خدمتګار په توګه له پنځو کلونو دندې وروسته مې په رسمي توګه خپل ماموریت پدې وزارت کې بشپړ کړ.”
د عامې روغتیا په وزارت کې د ښاغلي فیروز ماموریت په داسې حال کې پای ته رسیدلی چې افغانستان د کورونا ویروس سره په مبارزه کې سختې ورځې تیروي.
فیروزالدین فیروز د روان ۱۳۹۹ کال د حوت له پنځمې راهیسې د عامه خلکو او رسنیو د پاملرنې مرکز دی او دا هغه نیټه ده چې افغانستان کې د کورونا لومړنۍ پېښه پکې ثبت شوه، هغه پخپله هم په کورونا اخته شو خو موده وروسته یې په راښکاره کیدو د خپلې روغتیا اعلان وکړ.
فیروز چې د پنجشیر اوسیدونکی او د عبدالله د ټیم غړی و اوس د هغه پر ځای د ولسمشر محمد اشرف غني د تازه فرمان له مخې د بلخ پخواني والي عطامحمد نور ته نیږدې کس احمد جواد عثماني د عامې روغتیا وزارت د نوي نوماند او سرپرست وزیر په توګه ټاکل شوی دی.