تاند، یکشنبه، د جوزا ۱۱ مه: د کابل په جمهوریت روغتون کې د لومړي ځل لپاره له ليرې درملنه یا ټیلی میډیسن اسانتیا پیل شوې او دوه نورو روغتونو کې به هم پیل شي.
د افغانستان د مخابراتي خدماتو د تنظیم ادارې یا اترا مشر عمر منصور انصاري نن یکشنبه په کابل کې د روغتیا وزارت له مرستیال سره په ګډه خبري غونډه کې وویل، د ټیلیمډیسن بهیر به په درېیو روغتونونو د کابل جمهوریت روغتون، پکتیکا او سمنګان کې پلی شي چې دا پروژې نن په یادو روغتونونو کې پیلېږي او لګښت یې ۶۶۳ زره ډالره دی
نوموړي زیاته کړه: “دویمه پروژه، په لسو ولایتونو کې له ۲۷ نقاطو سره د فایبر نوري د کېبل تړل دي چې دا د عامې روغتیا د ریاستونو په ګډون لس روغتونونه سره رانغاړي او همدا راز ددې نوري کېبل له لارې په کابل کې هم ۷ روغتونونه سره تړل کیږي چې لګښت یې دوه نیم میلیونه افغانۍ کېږي.”
ښاغلي انصاري زیاته کړه، د ټیلي میډیسن په پلي کولو سره به په هېواد کې خلکو ته ګڼې اسانتیاوې رامنځته شي او د بودیجې په لګښت کې به شفافیت هم رامنځته شي.
په ورته وخت کې د افغانستان د عامې روغتیا مرستیال وزیر وحید مجروح وایي د ټیلي میډیسن وړاندې کول د روغتیايي سکتور لپاره ګټور دي.
نوموړی زیاتوي، که څه د ټول هېواد په کچه نه دی خو د ښې درملنې لپاره به ښه پیل وي.
د افغانستان د عامې روغتیا مرستیال وزیر وايي، له بده مرغه د کورونا وېروس لمن پراخېږي او په ټکو یوازینی هیله یې له خلکو دا ده چې روغتیايي سپارښتنې جدي ونیسي چې کولی شي په درې-څلورو اونیو کې د دې وېروس لمن راکابو کړي.