تاند، جمعه، د جوزا ۹مه: په کابل کې د کاتب په نوم یو خصوصي پوهنتون ادعا کړې چې د لومړي ځل لپاره یې په افغانستان کې د کورونا ویروس د تشخیص کېټونه جوړ کړي دي.
دغه پوهنتون پر خپله فیسبوک پاڼه خبر ورکړی چې دا تشخیصیه کېټونه یې د علمي تحقیقاتي مرکز څېړونکو جوړ کړي دي او د عامې روغتیا وزارت تر څنګ د لوړو زده کړو وزارت یې هم دا هڅه تایید کړې ده.
د غالب پوهنتون ادارې خبر ورکړی چې د دوی تشخیصیه کېټونه اوس کاملا د استفادې وړ دي.
بلخوا د عامې روغتیا وزارت په دې تړاو د تاند پوښتنو ته لا ځواب نه دی ویلی، خو په کابل کې یو حکیم ادعا کړې ده چې د کورونا درمل یې جوړ کړي دي.
خو د عامې روغتیا وزارت تر دې وړاندې هم ویلي وو چې د کورونا پر ضد د مبارزې لپاره ځینې طبي نوښتونه په نړیوالو معیارونو برابر نه دي رامنځته شوي.
تر دې وړاندې د هرات د روباتیک ګروپ نجونو هم ادعا کړې وه چې د مصنوعي تنفس ماشین یې د کورونا د ناروغانو لپاره جوړکړی دی.