تاند (جمعه، د جوزا۸) د افغانستان او هند ترمنځ مځکنۍ سوداګري له درو میاشتو وروسته پرون بیا پیل شوه.
هند د پاکستان پولې ته څېرمه د اتاري بندر د کورونا وایرس د خپرېدو د مخنیوي لپاره بند کړی و.
د هندي رسنیو د راپور له مخې، د امرتسر د ګمرک کمیشنر دیپکا کومار ګوپتا وویل، له افغانستان څخه یو کانتینر، چې وچه مېوه پکې بار وه، د پنحشنبې په ورځ له پولې ورواوښت.
راپور وايي چې د هند خاورې ته له رسېدو سره سم، د لارۍ موټرچلوونکی په هغه طبي مرکز کې معاینه شو چې د هندي پنجاب ایالت حکومت په سیمه کې د کورونا وایرس لپاره تازه جوړ کړی دی.
د دغه مرکز او ګمرک ټولو کارکوونکو ته لاسپوټوني او ماسکونه ورکړل شوي دي.
د هند د وچې مېوې د ټولنې رييس انیل مهرا وايي چې د اتاري بندر له لارې د هند او افغانستان د سوداګرۍ ارزښت د کال زر کروړ هندي روپیو ته رسېږي.