تاند، چهارشنبه، د جوزا ۷ مه: په تیرو شاوخوا دریو میاشتو کې د کرونا ویروس د مخنیوې له وېرې له افغان زندانونو ۱۳ بندیان ازاد شوي او د ا لړۍ لا هم دوام لري.
د افغانستان د زندانونو د چارو د تنظیم اداره وايي چې په محابسو کې د کوروناویروس د خپرېدو د مخنیوي لپاره کم تدابیر لري او دوی مجبور دي چې د لوړ خطر د نه رامنځته کیدو په خاطر دغه په ډېر شمیر بندیان خوشي کړي.
د دغې ادارې ویاند فرهاد بایاني له رسنیو سره په خبرو کې ویلي، چې په خوشې شویو بندیانو کې شاوخوا زر تنه ښځې او ماشومان هم شامل دي.
د زندانونو د چارو د تنظیم ادارې ویاند وایي، په زندانونو کې یوازې د اتلس زره بندیانو لپاره د کروناویروس څخه د ژغورنې روغتیايي تدابیر لري خو دلته د بندیانو شمیر په لوړ حد کې دی.
دوی وایي ولسمشر ته یې د همدې خطر په اړه خبرداری ورکړی و چې د ولسمشر د ځینو فرمانونو په اساس په لنډ وخت کې په ډېر شمیر بندیان ازاد شول.
افغان ولسمشر محمد اشرف غني په زندانونو کې د کوروناویروس د خپرېدو د مخنیوي لپاره او دغه راز د کوچني اختر او د غويي اتمې په مناسبت د لسګونو زرو بندیانو د خوشې کولو جلا فرمانونه صادر کړي دي.
د دغو فرمانونو په اساس ټاکل شوې څه باندې ۲۲زره بندیان چې د جنايي جرمونو له کبله په محابسو کې زنداني دي خوشې شي.
د افغانستان په زندانونو کې څه باندې څلوېښت زره بندیان ساتل کېدل او د روغتیا وزارت د وړاندیز په اساس چې په زندانونو کې د کوروناویروس د مخنیوي لپاره باید د ګڼې ګوڼې کچه راټیټه شي، د ولسمشر غني ددغو دوو فرمانونو په تطبیق سره به په زندانونو کې د بندیانو شمېر شاوخوا اتلس زرو ته راټيټ شي.
دا په داسې حال ده چې تیره ورځ هم د وسلوالو طالبانو ۹۰۰ بندیان ازاد شول او دا هم د همدغه شمیر خوشي شویو بندیانو برخه ده.